فارما جو - د. راشد بطاح

اليوم بدنا نحكي عن التأمين الصحي الي صعب نعبر عنه بنقابتنا العزيزة

هسه بصفتنا احنا اللي بنصرف الوصفات لكل الناس... واحنا المسؤولين عن صحة المواطن الاردني.... شافت النقابة انه يكون التأمين الصحي تبعنا... مختلف عن الاخرين... فقرروا تشجيعا للناس انه يتمسكوا بالتأمين تبعهم... انه يورجوهم انه مهما كان تأمينهم بخزي وبعر... لسه فيه تأمين نقابة الصيادلة بخزي اكثر منه بمليون مرة...

يعني لو واحد اعترض انه ليش ما بنصرفله هالدوا... بنحكيله احمد ربك.. تعال شوف تأمين النقابة عنا.. وبالتالي بتمسك المريض بالتأمين تبعه... وهيك احنا بنظل نربح

التأمين عنا... عبارة عن اشي اجباري عشان ندفع عليه مصاري زيادة... نسبة التحمل من اسوأ ما يكون... واحلى اشي انه فيه صيدليات ما برضو يصرفو وصفات النقابة... لانه فيه بينهم مشاكل ... مش فاهم كيف صيدلية متمشكله مع النقابة تبعتها... كيف صارت هاي؟؟؟

اذا كان فيه بديل اردني للدوا... لازم عالتأمين نوخذ الدوا الاردني... مش عشان اشي... بس زي ما بتعرفوا... بندعم الصناعة الوطنية... حتى لو كان على حسابنا الشخصي... وغير انه فيه منا ناس بتشتغل بالمصانع الاردنية... واللي بدري بدري شو بصير فيها.

واللي بده يصرف دوا شهري... بده يدفع نصف المبلغ... يعني شوف هالابداع.. بحملوك جميلة.. بالاحرى نص جميلة انهم بغطوا عنك... والسقف عندك 50 دينار... والباقي دبر حالك فيه... يعني لو بتوخذ بس علبة بلافكس... هي بطلع عليك 38 دينار.... وين التأمين بالموضوع؟؟؟

لا واحلى اشي صار معي مرة... انه المسؤول عن التأمين بالنقابة بحكي معه مرة... بحكيلي عادي اكتب انك صرفت الدوا واعطي المريض دوا ثاني واعطيه فرق السعر.... يعني بده اياني انصب عيني عينك... والمفروض انه النقابة بتعاقب على هيك شغلات... بس بتعرفوا... النقابة بتظل ادرى بمصلحتها وقوانينها اللي ما بتمشي على الكل

وبالنهاية بحيكلك.... اشترك بالتأمين... اجباري... يعني احمل حالي واشترك بتأمين درجة سابعة... بظل احسن من انه اشترك بالنقابة... على الاقل اسمه تأمين درجة سابعه ومعروف انه فاشل... بس تكون تأمين نقابة صيادلة... وهيك وضعك.... جد ابدعت النقابة

اللي بشتغل بالصيدليات بشوف ايش بتعمل نقابة المهندسين ونقابة المحامين... المحامين عملوا برنامج عالنت وموقع كامل بس عشان التأمين تبعهم.. وشوفوا الدلال اللي عايشين فيه... وحتى نقابة المهندسين الزراعيين... وعد لباقي النقابات

وبكفي بالنهاية احكيلكو المثل اللي بنطبق علينا.... جد انه باب النجار مخلوع... والاسكافي ماشي حافي

وتصبحوا على خير.. والله يخليلكو هالنقابة